مهما صار !!

مهما صار ومهما يصير
انته لول وانته الأخير
كيف ترضى بهذا البعاد
والله بُعدك يا خل غير
 ##
بعد المحبه والوداد
القلوب بهالشوق زاد
اتشربني كاس البعاد
والله بُعدك يا خل غير
 ##
عيني ع شوفك كم بكت
ونفسي ع فراقك اتولعت
وروحي يا كم.. اتمزعت
والله بُعدك يا خل غير
 ##
يا بو اسم بحرف نون
قرب عقلي ع الجنون
يا راعي القلب الحنون
والله بُعدك يا خل غير
 ##
بعد المحبه والوئام
تجفينيه والله حرام
وتزيد ابيه فالملام
والله بُعدك يا خل غير
 ##
تعال قرّب يالمزن
لصب عانى المحن
في حبكم انسجن
والله بُعدك يا خل غير
 ##
بالله يا خلي تعال
بالله يا ولد الغزال
اشتقت أنا للوصال
والله بُعدك يا خل غير
 ##
تسافر عني وتروح
وتزيد ابيه فالجروح
وتتركني ابدون روح
والله بُعدك يا خل غير
 ##
تبعد عني وترتحل
مثل الذيور اللي تفل
وينك يا نرجس وفل
والله بُعدك يا خل غير
 ##
وينك يا طبيب القلوب
عن لي جرحه عطوب
فالشمال انته أو جنوب
والله بُعدك يا خل غير
 ##
نسيت لك صبن يحب
نسيت كم عانى التعب
نسيت كم هو يحب ؟
والله بُعدك يا خل غير
 ##
تعبت من كثر الوقوف
وعيني ف عينك تشوف
وأتخايلك أنا ف الطيوف
والله بُعدك يا خل غير
 ##
قلبي فالمحبه تعب
ونفسي أصبرها غصب
وتتركني في المهب
والله بُعدك يا خل غير
 ##
والله بُعدك يا خل غير
والله بُعدك يا خل غير
والله بُعدك يا خل غير
والله بُعدك يا خل غير

سهيل

This entry was posted on Thursday, September 7th, 2006 at 2:51 pm and is filed under سهيلياتـ. You can follow any responses to this entry through the RSS 2.0 feed. You can leave a response, or trackback from your own site.

قهر »
« ستاربكس !!

7 تعليقات على “مهما صار !!”

  1. 1) أراميا:
    September 7th, 2006 @ 6:16 pm

    ماشاء الله الكلام جدا رائع
    و ليتني أستوي شاعرة مثلك …
    أنا كتبت أكثر من قصيدة بس المشكلة إني ماعرف كيف يوزنون القصيدة النبطية , لإني أنا أوزن قصيدتي بنفس طريقة القصيدة العربية القديمة.
    و دوم يوم أقرا اللي كتبته أحس إنى ولا شي من اللي الناس تكتبه…
    فأحسن لي ما أكمل هالمجال>>ههههه
    و بالتوفيق إن شاء الله يا أخ سهيل
    و نحن في إنتظار البقية
    :)

  2. 2) Suhail:
    September 7th, 2006 @ 6:24 pm

    السلام عليكم,

    أختي العزيزه “أراميا” أشكرج على المرور الطيب والرد الأطيب ولا هان قدرج يا ربي, والله يسلمج من كل شر وضر يا رب, تسلمين أختي العزيزه على الرد وتسجيل حضورج في هذي القصيده اللي نالت على اعجابج أختي العزيزه

    بالنسبه لوزن القصيده النبطيه أختي, فعندج طريقتين, الطريقه الأولى عن طريق التفعيله الشعريه, أو عن طريق التلحين وهي الأسهل, يعني تلحنين البيت بلحن معين وتسحبين هاللحن على القصيده كلها, فاذا بان خلل معين في اللحن فمعناته أن عندج شي زايد أو ناقص في البيت اللي بيّن الخلل فيه ولازم تراجعينه مره ثانيه =)

    سهيل

  3. 3) بنت الصيد:
    September 8th, 2006 @ 11:17 am

    صباح الخير

    هلا فيك اخوي سهيل
    مبروك عليك نص شعبان والله يبلغك رمضااان ياربي
    تسلم على الابداع المتجدد والمتميز الدائم

    وسمحلنا على التاخير :)

  4. 4) Suhail:
    September 8th, 2006 @ 1:29 pm

    السلام عليكم,

    أختي العزيزه “بنت الصيد” أشكرج على المرور الطيب والرد الأطيب ربي لا هانج, الله يبارك فيج والله يبلغنا جميعاً رمضان بإذن الله تعالى, والله يسلمج على المتابعه الطيبه لكل جديد في مدونتي المتواضعه =)

    سهيل

  5. 5) مهاري:
    September 27th, 2006 @ 5:43 pm

    أهلاو سهلا

    اخوي العزيز –سهيل– ثانكيو ع الكلام الطيب والإسلوب الأطيب ^_^ بصراحه الكلام عجبني وايد و و و حبيت أشكرك عليه …

    السموحه ع القصور ^_^ وتراني سرقت منه نك للمسنجر ههههه

    ثانكيو اخر مرة

  6. 6) Suhail:
    September 27th, 2006 @ 9:54 pm

    السلام عليكم,

    الأخت العزيزه “مهاري” أشكرج على مرور الطيب والرد الأطيب, وتسلمين على المرور الطيب ربي لا هانج, وأتمنى تكونين من زوار مدونتي المتواضعه بإذن الله تعالى

    مسموح تحطين أي بيت يعجبج في الماسنجر عندج =)

    سهيل

  7. 7) هبت ريح:
    July 6th, 2009 @ 11:57 pm

    مهما صار ومهما يصير “سهيل ” بقوافيه غير

    لك مني أسمى وأرق التحايا^_^

إكتُب تعليقك